L’aspirazioni à a paci hè di più in più spartuta. L’ iniziativi chì sò ufficializati un pocu dapartuttu è chì trapassa monda forzi pulitichi, assuciativi, culturali, ecunomichi, suciali è riligiosi mosciani a rialità di una situazioni cunflittuali in Corsica.

Escia d’issa situazioni, francà u cunflittu supponi prima di tuttu di determinani i raghjoni - tutti i raghjoni - è l’attori, innanzi di metta in piazza in cundizioni di un andatura di isciuta di crisa. Una dimustrazioni hè ghjè fatta : quidda di u fiascu di a riprissioni pulitica, chì circa sulamenti à neutralizà a voci di tutti quiddi chì rammentani chì un populu hè sempri oppressu… u Populu Corsu.


Aduniscia tutti i forzi di u muvimentu patrioticu

U tema discussu in a riunioni urganizata ùn ci hè tantu, da u PNC è annantu à a quali avemu dittu u nosciu parè, devi essa studiatu in un antra manera chì francà u quadru di una situazioni attuali.

L’isciuta di crisa supponi oghji, datu i gesti strutturali impurtanti chì sò stati fatti sulamenti da a noscia parti, di pettu à l’arruganza è à u disprezzu di a Francia, chì u muvimentu patrioticu attraversu tutti i so furmazioni mittissi in ballu un andatura strtegica.

A noscia participazioni à UNIONI NAZIUNALI và in issu sensu. Rammintamu a noscia vulintà di ricircà l’unità strategica. Parchì nimu ùn pratenda di fà a paci da par iddu, hè dunqua nicissariu d’adduniscia i nosci forzi è i nosci pruposti essenziali. L’unità strategica hà un doppiu meritu : Poni u muvimentu naziunali comu un’alternativa. Istituisci u muvimentu naziunali unitu comu unu di i principali attori di l’isciuta di crisa .


U drittu à a tarra, u drittu di u populu à essa ricunnisciutu

Rammintemu, hè un tema maiori di a noscia rivindicazioni, u drittu à a tarra parchi l’isula di Corsica hè prima di tuttu un territoriu naturalmenti delimitatu è sturicamenti abitatu da una cumunità uriginali sturicamenti spatrunata di a so tarra da una putenza militari straniera è chì fin’à oghji ùn hè ancu ricunnisciuta in i so dritti.

U drittu à a tarra hè una forma di resistenza pà tutti issi corsi chì attualmenti ùn ani u drittu à l’alloghju, à a pruprietà, incù d’altrondi à crisa economica è a disuccupazioni.

U drittu à a tarra và incu a ricunniscenza di u Populu Corsu comu CUMUNITÀ DI DRITTU.

Tocca dunqua à u Statu francesu à ricunnoscia u Populu Corse è à rendalli tutti i so dritti, ancu quiddu di scedda libaramenti u so distinu.


Favuriscia un’isciuta di crisa

Aviamu dighjà annunciatu cinqui punti pà cumincià à escia di a crisa (fundiariu, impiegu è ecunumia, lingua è cultura, evoluzioni stituziunali, prighjuneri pulitichi). Issi cinqui punti chì no lampavamu à a riflissioni à l’insembu di i forzi patriotichi corsi, è dinò à l’upinioni publica corsa, sò stati analizati comu determinanti pà inizià à un andatura pulitica.

Issa pruposta hè una cuntribuzioni pinsata, sottumissa à a cunfruntazioni d’altri punti da i quali devini escia i rivindicazioni essenziali di u muvimentu patrioticu attraversu tutti i so cumpunenti.

Ogni andatura supponi una manera di fà pricisa, rivindicazioni pricisi, è una participazioni cullittiva attrici di u so avvena. L’andatura sarà più cridibili si u muvimentu naziunali moscia a so unità stratégica di pettu à u Statu francesu. Unitu, puddarà favurizà un’isciuta di crisa perenna.


A situazioni oghji

A prughjezzioni strategica chì no rifemu dinò oghji ùn pò sminticà a situazioni attuali chì moscia bè chì i nosci rivindicazioni sò ghjusti.U guvernu francesu attuali incapaci di piddà in contu i dati essenziali di u prublema corsu, moscia quì dinò, chì i raporti di forza sarani più efficaci s’iddi sò purtati da una dinamica strategica di u muvimentu naziunali.

CNI piddarà in i ghjorni chì venini tutti i cuntatti necessari incù l’insembu di i furmazioni è cumpunenti patriotichi par chì tutti i tarreni di lotta, di risistenza è di custruzioni, ancu quiddi di u sistema in sesta, moscini una cunvergenza unitaria di lotta di pettu à u Partitu di a Francia è di l’anti Corsica.

© Corsica Nazione Indipendente — 2008